4142 hits

Coa chegada das vacacións de Nadal aos centros escolares moitas familias atópanse con dificultades para a conciliación da vida familiar e laboral, ao non coincidiren as vacacións de pais e fillos.
O Concello de Melide acaba de dar a coñecer unha proposta completamente gratuíta para ofrecer actividades lúdico-deportivas a nenos e nenas de entre 3 e 9 anos nestas datas de Nadal. O obxectivo, segundo destacou a concelleira de Cultura, Conchi Castro, é “achegar unha ferramenta de axuda ás familias, e ao mesmo tempo ofrecer actividades culturais e divertidas, atractivas para este tempo de lecer dos cativos”.

A concelleira nacionalista destacou que “os campamentos serán totalmente gratuítos”, e desenvolveranse no Edificio Multiusos dende o 22 de decembro ata o 2 de xaneiro.
Durante eses días, en dúas quendas por idades –de 3 a 5 e de 6 a 9 anos-, os rapaces e rapazas de Melide aprenderán a traballar elementos naturais, como a facer xabrón, ou outro tipo de manualidades artesanais. Segundo avanzou a concelleira, “os obradoiros diarios serán temáticos, para facelos máis atractivos, pero incorporarase en todos eles a importancia dos valores da protección ao medio ambiente, a solidariedade e o traballo en equipo”.

O prazo para a inscrición nestes campamentos urbanos de Nadal xa está aberto no Departamento de Cultura do Concello, onde é preciso anotarse para unha boa organización das actividades. O horario dos campamentos será de 09.30 a 14.00 horas.

Fonte boletín concello de Melide.