4164 hits

A concellería de Promoción Económica do Concello de Melide vén de facer pública a concesión dunha axuda de 6.000 euros para as dúas asociacións de comerciantes da vila, que se distribuirá a partes iguais entre ASETEM Centro Comercial Aberto e Vila de Melide Centro Comercial.
O concelleiro nacionalista, Antonio Díaz, avanzou esta medida como “unha forma directa de apoio a toda a veciñanza, posto que se reforzan os alicerces do comercio local nunhas datas tan puxantes como son para iso as do Nadal, e ao mesmo tempo promóvese o consumo de calidade sen ter que saír da vila”.
Antonio Díaz destacou que “o Nadal é a época clave para demostrar que o comercio en Melide non só está avalado pola tradición, senón que está solidamente artellado para desenvolverse no futuro”. Neste sentido, o concelleiro lembrou que o equipo de goberno ten no apoio ao sector do comercio unha das principais liñas de actuación, que se concretaron, entre outras medidas, coas dúas edicións que xa se celebraron de Mercamelide, a feira de oportunidades do comercio melidense que conseguiu unir en colaboración ás dúas asociacións de comerciantes que hai en Melide.

Amais desta colaboración directa con ASETEM Centro Comercial Aberto e con Vila de Melide Centro Comercial, o equipo de goberno dará a coñecer na vindeira semana a programación de Nadal, que volverá a espallarse dende o centro da vila ata as parroquias do rural.

Nota de prensa do concello de Melide